Sulmet javën e kaluar në një ndërtesë të OKB-së në Gaza , ku humbi jetën një punëtor bullgar, u shkaktuan nga një “tank izraelit”, tha sot zëdhënësi i OKB-së, duke njoftuar uljen e numrit të punonjësve të organizatës ndërkombëtare në Gaza.
“Sipas informacionit që kemi aktualisht, sulmet në një kompleks të OKB-së në Deir al-Bala më 19 mars u shkaktuan nga një tank izraelit,” tha Stephane Dujarric .
Një punonjës bullgar i OKB-së u vra në këto sulme, për të cilat Izraeli mohoi çdo përgjegjësi dhe gjashtë të tjerë (nga Franca, Moldavia, Maqedonia e Veriut, Mbretëria e Bashkuar dhe një palestinez) u plagosën rëndë.
“Vendndodhja e këtij kompleksi të OKB-së ishte e njohur për palët (të përfshira) në konflikt,” theksoi Stephane Dujarric. Sekretari i Përgjithshëm Antonio Guterres “dënon në termat më të ashpër këto sulme dhe bën thirrje për një hetim të plotë dhe të pavarur,” përsëriti ai. Sekretari i Përgjithshëm “mori vendimin e vështirë për të reduktuar gjurmën e OKB-së në Gaza”, theksoi ai.
Izraeli tha javën e kaluar se po hetonte rrethanat e vdekjes së punonjësit bullgar të OKB-së. Ushtria izraelite, e akuzuar nga Hamasi, kishte mohuar se “goditi një kompleks të OKB-së në Deir al-Bala”, në Rripin verior të Gazës, ndërsa një zëdhënës i ushtrisë siguroi se nuk kishte “asnjë aktivitet operacional” në zonë.
Në këtë moment, dhe ndërsa Izraeli ka rifilluar sulmet ajrore dhe operacionet tokësore në Rripin e Gazës, duke shkelur armëpushimin në fuqi që nga janari, OKB-ja ka vendosur “për arsye sigurie dhe operacionale” të “zvogëlojë praninë” e organizatës në enklavën palestineze, tha sot Stephane Dujarric.
Kjo do të thotë se numri i stafit të OKB-së në Rripin e Gazës do të reduktohet përkohësisht “rreth një të tretën këtë javë dhe ndoshta pak më shumë”, shpjegoi ai, ose rreth 30 nga 100 punëtorë atje. Masa ka të bëjë veçanërisht me stafin e UNICEF-it, Organizatës Botërore të Shëndetësisë, Programit Botëror të Ushqimit dhe Zyrës së OKB-së për Koordinimin e Çështjeve Humanitare (OCHA).
“OKB nuk po e braktis Gazën,” theksoi ai, duke kujtuar praninë vendimtare të rreth 13,000 punonjësve të agjencisë së OKB-së për refugjatët palestinezë (UNRWA).
