Prej pranverës të vitit të kaluar me iniciativë tërësish private një grup të rinjsh u bashkuan në një grupim të quajtur ‘’Çeta’’. Synimi i këtij grupi ishte të shfrytëzonte hapësirën publike, për të bërë art figurativ. ‘’Stret-art’’ i veçantë, pasi në qendër janë çështjet që kanë shqetësuar prej kohësh opinionin shoqëror.
Ata kanë portretizuar dhe vendosur në shumë kënde të rrugëve të Tiranës disa nga ‘’personazhet’’ që u bënë objekt i debatit në vend. Piktura e Ardit Gjoklajt apo e nënës që tatimorët i bllokuan perimet pasi shiste në informalitet, janë dy nga më të përdorurat.
Duke i konsideruar hapësirat publike si të përdorura historikisht në Shqipëri nga politikanët për propagandë, Çeta pretendon se përmes mesazheve politike që grupimi përcjell, po krijon një mënyrë të drejtpërdrejtë komunikimi me qytetarët për të nxitur ndërgjegjen civile.
“Streetart ka pasur edhe përpara Çetës në Tiranë, por Çeta ka diçka që të tjerët nuk e kanë. Të paktën edhe sot, me 9 ndërhyrje që kanë bërë, janë 9 ndërhyrje që kanë kapur direkt momentin e problematikës sociale,” tha për BIRN kritiku i artit Romeo Kodra, duke shtuar se grupimin e veçon gadishmëria për të vepruar dhe leximi i kohës.
“Është një mënyrë për t’u ballafaquar me publikun pa filtrin e institucioneve, dmth është mënyra më direkte për të pasur impakt me publikun,” shtoi ai. (E.K/SHUPLAKA)
[ngg_images source=”galleries” container_ids=”648″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]
