‘Nobel’-i në Letërsi/ “Unë dhe djali im e dëshironim”, Janulla Rrapi për Kadarenë: Kryevepra e tij do të ishte pendesa

Janulla Rrapi, nëna e djalit që dashuronte vajzën e Ismail Kadaresë, ka reaguar pas vendimit të Akademisë Suedeze për t’iu dhënë çmimin “Nobel” në Letërsi dy shkrimtarëve, polakes Olga Tokarczuk dhe austriakut Peter Handke.

Rrapi kujton se i nominuari i parë shqiptar për këtë çmim ka qenë Gjergj Fishta ndërsa thekson se pas rënies së sistemit komunist, çdo vit në muajin tetor Ismail Kadare, edhe pse i shërbeu me besnikëri e përulje atij sistemi dhe e ngriti në piedestal figurën e diktatorit Enver Hoxha, pret me ankth ta fitojë atë.

“Si shqiptarë dhe si njerëz që e duam shumë atdheun tonë, edhe pse prej gati 30 vjetësh jemi të larguar nga halli prej tij, unë dhe djali im Renato Rrapi do ta deshironim shumë që ky çmim i madh të vinte në vendin tone”, shkruan Janulla Rrapi.

Por ajo shton se Kadare nuk e meriton këtë çmim për shkak të bëmave ndaj djalit të saj, Renatos, të cilit thotë se i ka shkatërruar jetën. Rrapi shkruan se kryevepra e Kadaresë do të ishte të kërkonte falje ndaj këtij të fundit për të cilin thoptë se do ta pranonte kurdo që të vinte.

Reagimi i plotë:

Akademia Suedeze sot ua dha Çmimin Nobel në letërsi dy shkrimtarëve, polakes Olga Tokarczuk dhe austriakut Peter Handke. Ky çmim prej shumë vitesh është adhuruar e lakmuar edhe nga vendi ynë.
Shkrimtari i parë shqiptar që u emërua për këtë çmim ishte poeti ynë kombëtar i dënuar deri me zhdukje të eshtrave nga sistemi komunist, Gjergj Fishta, ndërsa pas përmbysjes së këtij sistemi në Shqipëri çdo vit në muajin tetor Ismail Kadare, edhe pse i shërbeu me besnikëri e përulje atij sistemi dhe e ngriti në piedestal figurën e diktatorit Enver Hoxha, pret me ankth ta fitojë atë. Por fatkeqësisht ai ende nuk është laureuar me këtë çmim.
Si shqiptarë dhe si njerëz që e duam shumë atdheun tonë, edhe pse prej gati 30 vjetësh jemi të larguar nga halli prej tij, unë dhe djali im Renato Rrapi do ta deshironim shumë që ky çmim i madh të vinte në vendin tonë. Por si viktimë e bëmave monstruoze të Kadaresë ndaj Renatos në kulmin e rinisë dhe talentit, ai nuk e meriton këtë Çmim si dhe shumë ndere të tjera që vazhdojnë t’i bëhen nga pushtetarët e të gjitha ngjyrave në këto vite demokraci, ashtu siç i janë bërë edhe nga sistemi komunist.
Nëse Kadareja do ta kishte pranuar publikisht dhe i penduar krimin që i bëri jetës së djalit tim, kjo do të ishte vepra e tij më e mirë dhe më e çmuar. Me këtë kryevepër ai do ta nderonte veten dhe mbase do ta kishte fituar edhe Nobelin. Le t’ia lëmë kohës e të besojmë se kjo ditë e pendesës së tij publike nuk do të jetë e largët. Atëherë Renato Rrapi do ta falë me gjithë mirësinë dhe fisnikërinë që vazhdon ta ketë edhe sot.

(F.GJ/FAXWEB.AL)