Noka: Ne e morëm përgjegjësinë tonë për Lazaratin! Vettingu në polici, tregues i kriminalizimit dhe jo suksesit të saj

Deputeti demokrat Flamur Noka në studion e Fax News është shprehur se Policia e Shtetit është në gjendjen e saj më të errët.

“Në vend të kriminelëve, kemi drejtues policie në kërkim,”- tha Noka.

I ftuar për të folur për Vettingun në polici, Flamur Noka tha se për degradimin dhe kanabizimin e policisë, opozita bën përgjegjës vullnetin politik të kryeministrit Rama dhe ish-ministrit të brendshëm, Saimir Tahiri.

“Askush nuk mund të thotë sot se 320 oficerë të policisë të liruar nga Ministria e Brendshme në vitin 2004 si pasojë e kërkesës së Ambasadës Amerikane, të futur rishtazi në vitet 2013-’14, nuk është pa vullnetin e Ramës dhe Tahirit.”- tha ish-ministri i brendshëm në kohën e qeverisë së PD.

“Në projektligjin e Vettingut të sotëm për policinë hidhet poshtë besueshmëira e policisë, ajo polici që u propagandua lart e poshtë nga Rama dhe Tahiri si ‘policia që duam’ apo ‘policia më e besueshme se institucionet fetare’ apo ‘koha e pandëshkueshmërisë ka mbaruar’.” – vijoi Noka.

“Vettingu duhet të fillojë nga lartë poshtë dhe në të duhet të kalojë i pari kryeministri,” – tha ai.

“Vendimet e gjykatës për largimet në polici në vitet 2013-2014,  kanë përcaktuar se ato kanë qenë të jashtëligjshme.”

Deputeti demokrat tha se nuk është aspak optimist për procesin e Vettingut në polici pasi ata që patën vullnetin politik për ta kriminalizuar janë ende në pushtet.

Pyetjes së gazetares për përgjegjësitë politike të tij për efektivët e inkriminuar në Lazarat, në kohën kur ishte ministër i brendshëm, Noka iu përgjigj se ata kanë marrë të gjitha përgjegjësitë politike, administrative dhe penale sipas ligjit të Policisë së Shtetit, duke i bërë rastet publike.

(E.L/Faxweb)