Acarohen marrëdhëniet mes kompanisë “Apple” dhe asaj “Nokia”. Kjo e fundit ka paditur kompaninë amerikane për shkelje të 32 patentave teknologjike , duke pretenduar se produktet e Apple përdorin shumë nga shpikjet e patentuara të tyre që prej vitit 2011, shkruan “Reuters”.
Pretendimet e “Nokia”-s lidhen me ekranin, programet “software”, antenat, çipat dhe kodifikimin e videove. Deri në vitin 2011 ishte kompania finlandeze, ajo që dominonte tregun me telefonat e saj, por shumë shpejt suksesi i saj u sfumua me daljen në treg të “Apple”. Për këtë arsye, “Nokia” e shiti biznesin e saj të telefonave te kompania “Microsoft”.
Por këtë vit, në bashkëpunim me një kompani të re të quajtur “HMD Global”, ata po planifikojnë prezantimin e teknologjisë së fundit të “smartphone”-ve “Nokia 2017”.
Apple nga ana e saj nisi një betejë ligjore me korporatën “Acacia”, duke i akuzuar se po bashkëpunojnë me Nokian për të përfituar të ardhura nga kompania e tyre. (A.R/SHUPLAKA)
