Nuk arritën objektivat e shitjes, menaxherët detyrojnë stafin të pijnë urinë dhe të hanë buburreca

Menaxherët e një firme kineze kanë detyruar stafin i cili nuk mundi të arrijë objektivat e shitjes, që të pijnë urinë dhe hanë buburreca.

Policia mori masa pasi u shfaqën videot që tregonin se si punonjësit po rriheshin me rrip dhe detyroheshin të pinin një lëng të verdhë.

Mesazhet që qarkullojnë nëpër mediat sociale dëshmojnë se stafit i thuhej gjithashtu të hanin buburreca nëse ata nuk i përmbushnin objektivat.

Tre menaxherët u burgosën, raporton South China Morning Post.

Një video e shpërndarë gjerësisht në faqen e medias sociale kineze Weibo tregon një punëdhënës mashkull që qëndron në mes të një rrethi, duke e rrahur me një rrip punëtorin e tij.

Një pjestar tjetër i stafit, që thuhet të jetë punonjës i kompanisë për rinovimin e shtëpive në qytetin Guizhou,  shihet duke pirë lëng të verdhë nga gota plastike ndërkohë që mbante mbyllur me duar hundët e tij.

Sipas njoftimeve të medias, forma të tjera të ndëshkimit në firmë kanë përfshirë pirjen e uthullës si dhe mbajtjen e kokës të rruajtur.

Kompania njoftohet se nuk arriti të paguante pagat e punonjësve gjatë dy muajve të fundit dhe stafi ishte i frikësuar të fliste pasi mendonin se do të humbnin punën nëse do të protestonin.

Policia në qarkun Zunyi arrestoi tre menaxherë dhe më vonë ata u dënuan me burg.

Kjo është ngjarja e fundit e këtij lloji në një varg rastesh të firmave kineze që përdorin masa të pazakonshme për të ndëshkuar dhe turpëruar stafin e tyre.

Raportet e mëparshme kanë bërë të njohura rastet kur punonjësit goditnin njëri-tjetrin për të rritur motivimin.

Gjithashtu ka ndodhur që në një rast tjetër stafi detyrohej të zvarritej në një rrugë publike ose të puthte kazanët e mbeturinave si dënim.