Kreu i PD-së Lulzim Basha ka reaguar lidhur me përplasjet në Devoll, teksa thotë se Bashkia është marrë peng nga punonjësit e policisë.
“Pushteti i paligjshëm i 6% po uzurpon me dhunë qeverisjen lokale, kundër vullnetit të popullit. Ky regjim kriminal dhe plaçkitës po hyn në rrugën e verbër të përplasjes me popullin e tij. Sot hajdutët në pushtet ndjehen të mbrojtur se kanë polici speciale, gaz lotsjellës dhe mercenarë, por nesër do të kenë fatin që meritojnë hajdutët dhe banditët!”, shkruan Basha në statusin e tij.
Prej disa ditësh në Bashkinë e Devollit ka pasur përplasje mes kryetarit aktual të Bashkisë Bledion Nallbati dhe Eduard Duros, i zgjedhur në 30 Qershor. (Lexo edhe ketu)
Mëngjesin e sotëm prej orës 6 e 30 ka mbërritur në institucionin e Bashkisë Eduard Duro, fituesi i zgjedhjeve të 30 Qershorit nën siglën e PS-së, i rrethuar nga një numër shumë i madh i forcave të rendit.
Nga ana tjetër jashtë godinës së bashkisë ka mbetur kryetari aktual Bledion Nallbati, i cili pretendon se institucioni është pushtuar në mënyrë të paligjshme, dhe me mbështetjen e forcave të rendit.
Nallbati ka qenë i shoqëruar nga administrate e bashkisë, por nuk është lejuar që të futet në ambientet e brendshme të institucionit.
“Bashkia u dhunua në prezencë të deputeteve dhe prefektit të Korcës. Brenda bashkisë ka forca speciale. Unë jam kryetari i ligjshëm i bashkisë, i zgjedhur nga 59 përqind e qytetarëve. Do jem këtu cdo ditë, 24 orë në ditë. Do të vazhdoj tju shërbej qytetarëve. Bashkia është pushtuar. Nuk di cka ndodhur me dokumentacionin që ndodhet në zyra. Administrata nuk mund te hyje ne bashki dhe te nise punen nën terrorin e policis”, është shprehur Nallbati për mediat.
(E.K/Faxweb.al)
Discussion about this post