Banorët e fshatit Bushkash në njësinë administrative Ulëz të Bashkisë së Matit, paralajmërojnë të mos marrin pjesë në zgjedhjet e 18 qershorit dhe të ngrihen në protesta. Kjo sepse prej pesë vitesh tashmë, edhe pse qendra e fshatit është vetëm dy kilometra nga rruga nacionale, rruga e tyre është kthyer në makthin e drejtuesve të automjeteve. Gropa të mëdha dhe mungesa e kanaleve kulluese anësore, është gjëja e parë që bie në sy.
Për shkak të mosndërhyrjes së shtetit, kjo rrugë është shndërruar në një problem të madh për banorët, pasi automjetet e tyre bëhen shumë shpesh për servis.
Banorët e Bushkashit paralajmërojnë për “Shuplaka-n” se jo vetëm nuk do marrin pjesë në votime, por nuk do të lejojnë as të tjerët që të hapen qendrat e votimit.
Ata i bëjnë thirrje kryetarit të bashkisë të hedhë sytë nga ta, dhe t’i japë një zgjidhje këtij problemi. Veç rrugës kryesore të fshatit, banorët thonë se problem mbetet edhe furnizimi me ujë të pijshëm. (D.D/Shuplaka)
Discussion about this post