Ai përpiqet çdo ditë për të kontribuar dhe punuar brenda mundësisve të tij. Fjalën e kemi për 32 vjeçarin, Jetmir Hilën i cili karakterizohet nga mirënjohja, durimi dhe këmbëngulja .
Por jeta për të nuk është treguar aq e drejtë. Vetëm kur ishte një bebe ai është paralizuar nga një temperaturë e lartë.
Por ai ia ka dalë jetës së tij, madje sot edhe punon. 32 vjeçari ka mbaruar një kurs grafik/ design dhe punon i pavarur për të bërë kartëvizita dhe postera të ndryshëm.
“Unë kam nevojë, nuk ka nevojë klienti. Klienti do punën, po nuk ia bërë mirë nuk të vjen më. Mundohem të punoj natën, nga ora 11 i natës deri në 3 të mëngjesit”, shprehet për Report Tv Hila.
Po kështu Hila ua çon edhe vetë porositë klientëve. Ende është duke vazhduar shkollën, edhe pse është më i madhi i kalsës ai ndjek arsimin e detyruar dhe është në klasën e katërt, ku dhe po mëson dhe gjuhën angleze. Ai bën edhe terapi logopedie, për të përmirësuar komunikimin.
“Unë çohem në 5 të mëngjesit. Fal sabahun dhe në 6 mëngjesit dal për në shkollë. Duhet të jem në 8 pa 5 në Laprakë për të shkuar në shkollë në Vorë. Mua më pëlqejnë shumë gjëra. Dua të kem mundësi të ndihmoj të tjerët. Të kem mundësi të punoj e ndihmoj veten time. Të mos i bie në qafë njeriu”, shprehet 32 vjeçari Jetmir Hila. (J.V/Shuplaka)
Discussion about this post