Deputeti i Partisë Socialiste Taulant Balla ishte sot në një takim me studentët e Elbasanit, ku deklaroi se zgjedhjet do të kryhen patjetër më 18 qershor dhe nuk ka dyshime për këtë.
“Zgjedhje nuk e luan as topi që do të bëhen më 18 qershor. Në atë ditë bëhet provimi i politikës dhe politikave para popullit. Partia Socialiste është e sigurtë që fiton shumicën por gjithsesi mirëpret vijimin e koalicionit me LSI-në. Ndërsa çadra e Partisë Demokratike tashmë ka bërë të 40-at. Ajo çadër është vendi ku janë mbledhur politikanët e korruptuar që janë kundër Reformës në drejtësi,” tha Balla.
Ndërkohë, deputeti i PS-së foli edhe për një xhelozi që nuk ekzistonte midis tij dhe kryetarit të Bashkisë së Elbasanit, Qazim Sejdini.
“Unë dhe Qazimi nuk kemi xhelozi për njëri-tjetrin. Ne na interesoni ju (i drejtohet studentëve) pasi ju jeni e ardhmja e gjeneratës tjetër. Nxis secilin prej jush të ketë ambicie që nesër të përfaqësojë Elbasanin në Kuvendin e Shqipërisë,” shtoi Balla. (D.D/Shuplaka)
