Në një kohë kur çdo ditë e më shumë opozita kërkon zgjedhje të parakohshme dhe qeveri teknike, media të ndryshme kanë hedhur dhe teza se kush do të jetë socialisti që zëvendëson Edi Ramën.
Nëse emri i parë që na vjen në mendje është ai i Pandeli Majkos, tashmë media lokale kanë hedhur në qarkullim dhe një emër surprizë, siç është ai i Evis Kushit.
“Evis Kushi është një nga kandidatet e mundshme për Kryeministre e Qeverisë Teknike. Lajmi po qarkullon gjithnjë e më shumë ditët e fundit, dhe po komentohet nga analistë më në zë nëpër studio televizive, dhe jo vetëm.
Sipas tyre, nëse do të arrihet marrëveshja për krijimin e Qeverisë Teknike që do të dërgojë vendin në zgjedhje, tre janë kandidatët e mundshëm, Evis Kushi, Pandeli Majko dhe Musa Ulqini. Por mes tyre duket se më pranë këtij posti ndodhet deputetja e Elbasanit, Evis Kushi e cila prej kohësh gëzon mbështetjen e Edi Ramës, Taulant Ballës dhe Gramoz Ruçit.
Gjithashtu Kushi konsiderohet si një figurë e pranueshme edhe nga opozita, pasi nuk është shquar si deputete e “ekstremit të majtë“. Fjalimet e saj në parlament kanë qenë të ekuilibruara dhe të argumentuara politikisht dhe profesionalisht.
Dhe ku “ka zë nuk është pa gjë”, thotë një shprehje e pavdekshme e popullit. Ditë e fundit po flitet gjithnjë e më shumë për një kompromis për të dalë nga kriza e pazakontë politike që ka përfshirë vendin. Duket se muaji maj do të ketë zhvillime interesante. Le të presim dhe të shohim nëse vërtet do të kemi një Kryeministre femër e për më tepër nga Elbasani”, shkruan Infoelbasani.al.
(E.K/FAXWEB.AL)
Discussion about this post