Paris Saint-Germain theu çdo rekord vitin e kaluar me dy transferime më të mëdha për momentin në botën e futbollit sa u përket shifrave. Al-Khelaifi solli në Paris yllin brazilin Neymar për një shifër prej 222 milionë eurosh dhe Kylian Mbappe për 180 milionë euro nga Monaco.
Por duket se edhe pse dështoi në Champions League, presidenti i PSG nuk ka ndërmend që ta shesë yjet e tij, të paktën kështu është shprehur për njërin prej tyre, Kylian Mbappen për të cilin ka deklaruar se nuk është i gatshëm ta shesë as për 1 miliardë euro.
“Kylian Mbappe vlen 1 miliard euro. Po, thashë 1 miliard. Por, edhe po të m’i jepnin, nuk do ta shisja”, ka thënë Presidenti i PSG.
19-vjeçari Mbappe kaloi nga Monaco te PSG për 180 milionë euro. Në sezonin e tij të parë me klubin francez ai shënoi 21 gola në të gjitha kompeticionet.
(B.H/Faxweb)
