Deputetja Rudina Hajdari, e cila ishte dje pjesë e tryezës gjithëpërfshirëse për Reformën Zgjedhore, ka mbledhur paraditen e sotme grupin e saj parlamentar.
Hajdari nuk firmosi dje shkresën për ‘’Këshillin Politik”, me pretendimin se ajo do të duhej të konsultohej me deputetët e grupit të saj parlamentar.
Burime bëjnë me dije se në mbledhje është diskutuar për ndryshimin e sistemit, grupi demokrat kërkon të shtohet në objektin e punës edhe pika e ndryshimit të sistemit.
Një nga pikat për të cilat është kritikuar më së shumti Hajdari, ka qenë pikërisht qendrimi i saj i prerë për ndryshimin e sistemit, që u harrua me kalimin e kohës.
“Parimisht jam dakord me përmbajtjen e dokumentit në fjalë, që u diskutua sot në mbledhjen e zhvilluar. Kam kërkuar që të ketë një qartësi më të madhe ‘sa i përket angazhimit që ky Këshill do të ketë në lidhje me diskutimin për ndryshimin e sistemit zgjedhor, sic dhe e përmban objekti i Komisionit për Reformën Zgjedhore.
Gjithashtu, duke qenë se u njoha SOT me përmbajtjen e këtij dokumenti, më duhet të marr pak kohë të konsultohem dhe me kolegët e mi në Parlament në lidhje me dokumentin në fjalë. Si përfundim, ajo c’ka është më e rëndësishme është fakti që takimi i zhvilluar bëhet në kuadër të dialogut për të garantuar një konsensus të gjerë dhe sa më transparent për procesin e Reformës Zgjedhore”, ka thënë dje Hajdari për Fax News.
Discussion about this post