Aktorja Carrie Fisher, e njohur për rolin e saj si “Princeshë Leila” ka ndërruar jetë në moshën 60-vjeçare pas rëndimit të situatës shëndetësore që pasoi atakun kardiak të disa ditëve më parë.
Pavarësisht roleve në prodhime të mëdha hollivudiane, “Star Wars” mbetet filmi më i rëndësishëm i saj.
Lajmi për vdekjen e saj u bë i ditur një ditë më parë nga familjarët. 60-vjeçarja ishte duke u kthyer nga Londra ku kishte promovuar librin e saj të fundit “Ditari i Princeshës” e ku kishte marrë pjesë edhe në xhirimet e serialit “Catastrophe”, ku u godit nga ataku kardiak në avion.
Aktorja pati një histori të gjatë të problemeve shëndetësore. Ajo iu nënshtrua trajtimit për varësisë ndaj kokainës rreth viteve ‘80 dhe vuante nga çrregullimi bipolar. Këto përvoja ajo i rrëfeu në romanet e saj gjysmë-autobiografike.
Në librin e saj më të fundit, aktorja rrëfen edhe një histori dashurie të shkurtër por të vrullshme që ajo pati me Harrison Ford, kolegun e takuar në shesh xhirimin e “Star Wars” asokohe 33-vjeçar i martuar dhe me dy femijë, ndërsa Carrie vetëm 19 vjeçe. (XH.A/SHUPLAKA)
Discussion about this post