Diplomati i njohur Ettore Francesco Sequi, 63 vjeç, i cili ka shërbyer edhe në Shqipëri si Ambasador i BE-së, u është drejtuar autoriteteve në Itali pasi e përndiqnin dhe e kërcënonin në telefon.
Në vitin 2017, Ettore Sequi kishte patur një lidhje të shkurtër me autoren dhe skenaristen e RAI-t, Valentina Pizzale, 41 vjeçe, por pas ndarjes ajo nisi ta përndiqte me mesazhe të tipit “do të të shkatërroj” duke e fyer në çdo orë të ditës, por veçanërisht natën.
Pizzale ka përfunduar dje në arrest shtëpie, me akuzën për kërcënim, pas denoncimit të Sequi-t. Qëllimi i saj ishte të detyronte ambasadorin të mos i jepte fund lidhjes me të dhe këtë kërkonte ta arrinte duke e kërcënuar atë se do të bënte publike lidhjen e tyre.
Pizzale e dinte që po hetohej pas denoncimit të diplomatit, por vijonte ta përndiqte atë. Aktualisht 41-vjeçarja është në apartamentin e saj dhe nuk mund të komunikojë me botën e jashtme, madje as përmes mediave sociale.
Diplomati, i cili ka qenë konsull në Teheran, sekretari i parë në përfaqësinë italiane në selinë e OKB në New York, këshilltar i ambasadës në Tiranë dhe më pas përsëri përfaqësues i BE-së në Afganistan dhe Pakistan, u mundua ta menaxhojë situatën në një fshehtësi të plotë, por nuk ia doli dot dhe sot ka përfunduar në faqet e para të çdo medie italiane.
