E mbledhur pasditen e sotme për të shqyrtuar kërkesën e LSI-së për përjashimin e kryeministrit Rama, Byroja e Kuvendit e rrëzoi këtë kërkesë.
Të enjten e shkuar, një javë më parë, kryeministri Edi Rama përdori një fjalor, sipas opozitës, rrugaçëror, duke përdorur krahasimin e popullit me organin gjenital.
Nga burime të Fax News, Byroja e Kuvendit e ka rrëzuar kërkesën e LSI me gjashtë vota kundër dhe tre pro. Sipas anëtarëve të shumicën në Byro, nuk pati fjalë fyese nga kryeministri në Kuvend.
“Nuk mundni dot ju të bllokoni asgjë dhe të pengoni asgjë, dhe për më tepër pastaj, jo po…, shiko këtu se do të ngrihen këta, do ngrihen ata. Kjo e ngritjes është, ‘thirri-thirri të të ngrihet, ai i shkreti kokë ulur s’të përgjigjet dot’” – kështu u shpreh kryeministri Rama një javë më parë, më 29 mars gjatë fjalës së tij në seancën plenare, shprehje për të cilën nëntë deputetë të LSI i dërguan letër kryetarit Gramoz Ruçi për përjashtimin e Ramës.
Menjëherë pas përfundimit të mbledhjes, deputeti demokrat Edi Paloka, e cilësoi skandaloz vendimin e dhënë nga mazhoranca në Byro.
“Arritëm deri aty sa zonja Hysi kërkoi edhe përjashtimin e atyre që kanë bërë kërkesën, sepse sipas saj në këtë kërkesë fyhej kryeministri.
Si përfundim u mor vendimi që kryeministri të shpallej i pafaj. Ne mbajtëm qëndrimet tona, sepse nuk mundet që të arrihet në një nivel të tillë, që një kryeministër të fyej një popull të tërë duke e quajtur organ gjenital, dhe këta të mos kenë guximin ta dënojnë.
Në këtë Shqipëri dënohen qytetarët dhe lirohen kriminelët. Nuk presim asgjë tjetër, prandaj opozita i është bashkuar popullit.
Nuk ka rrugë tjetër, do të vijohet të përballemi sepse vetëm në këtë mënyrë do të përballemi ne këtë kryeministër.” – tha Paloka.
(E.L/Faxweb)
