Para pak ditësh në autostradën Tiranë-Durrës u përplas me makinë 17-vjeçari Nertil Pëllumbi nga gazetarja Mira Kazhani.
Nertili në muajin maj mbush 17 vjeç edhe pse sipas familjarëve policia e kishte shënuar si 76-vjeç në raportin e aksidentit.
Gjithçka u mbajt e fshehtë, por si qëndron e vërteta? Një nga familjarët e Nertilit ka rrëfyer për JOQ Albania të gjithë kronologjinë e ngjarjes së rëndë tashmë, ku i riu po lufton me jetën.
Familjarët shprehen se Nertili nuk është aksidentuar në rrugë por jashtë saj, dhe dyshimet e tyre janë se gazetarja ka qenë e dehur.
“Kjo është gjendja e djalit tonë Nertilit për ata që nuk e besojnë. Ai mbahet gjallë me tuba dhe nuk e dimë nëse ka shpresë apo jo. Atë ditë që është aksidentuar e ka përcjellë halla e tij dhe po priste për autobus për të ikur për Durrës. Pasi e ka aksidentuar e ka dërguar në spital me makinë private dhe ne si familjarë nuk kemi ditur asgjë për tre ditë me radhë për djalin tonë. I ati nuk ka lënë vend pa e kërkuar sa shprehej se mbase ku do ta gjente të vdekur në ndonjë kanal.
Nuk kemi lënë vend pa shkuar, dhe në polici, por nuk na jepnin asnjë informacion. Pas tre ditësh e morëm vesh që e kishin regjistruar e të njëjtin emër por në moshën 76-vjeç. Shkuam në spital dhe u tronditëm kur e gjetëm Nertilin në atë gjendje. Ajo plehra që e aksidentoi nuk ka ardhur njëherë që të vizitojë familjarët sepse mendon se ai fëmijë është pa familje. Unë e kuptoj se aksidente ndodhin kudo, por nuk ia falim që e fshehu dhe e manipuloi ngjarjen. Nuk e kuptoj si nuk është në burg ajo femër kur ne na gjobisin për një rrip sigurimi.
Si nuk merr guximin policia të zbardhë ngjarjen?! Apo nuk ka rëndësi nëse nuk është fëmija e një politikani apo e një VIP-I por e një qytetari të thjeshtë! Nertili është vërtetë nga nëna pasi nuk e ka njohur kurrë por nuk është po familje”, u shprehën familjarët.
(F.GJ/FAXWEB.AL)
Discussion about this post