Ndonjëherë pyetjet e një gazetari mund të mos jenë më të lehtat për t’u përgjigjur, megjithatë rrallë herë i intervistuari reagon në një mënyrë të tillë. Një gazetar rus e gjeti veten në tokë, pasi i bëri një pyetje të sikletshme një administratori lokal. Incidenti çoi në hapjen e një hetimi kriminal mbi zyrtarin dhe përjashtimin e tij nga partia.
Grupi i xhirimit të kanalit televiziv Russia 24 shkoi për të marrë një koment nga drejtuesi i administratës lokale, Sergey Zaytsev, për një material që po realizonin për kushtet e shtëpive të të mbijetuarve nga zjarret, në një zonë të Republikës së Khakassia në Siberi. Zjarret e 2015-s vranë me dhjetëra persona dhe lanë shumë të tjerë pa shtëpi. Në atë kohë, Zaytsev u akuzua për neglizhencë kriminale dhe u dënua me 4 vjet burg. Por përfitoi nga amnistia dhe arriti të mbante postin që kishte.
Intervista me Zaytsev nisi keq që në fillim, pasi gazetari e pyeti për fondet shtetërore të lëvruara për shtëpitë e reja për të mbijetuarit, pyetje të cilës ai refuzoi t’i përgjigjej.
Në 2015-n qeveria u dha si detyrë autoriteteve lokale që të zëvendësonin shtëpitë e djegura me ndërtesa të reja. Por sipas banorëve punimet u zvarritën për vite të tëra dhe në fund ndërtesat ishin jo cilësore dhe të papërshtatshme për të jetuar.
Situata mes gazetarit dhe zyrtarit përshkallëzoi kur ky i fundit, i bezdisur nga pyetjet për akuzat për korrupsion dhe dënimin në të shkuarën nisi të fyente gazetarin, ta shtynte e në fund ta hidhte përtokë.
Videoja në fjalë u postua në shumicën e mediave në Rusi dhe shkaktoi debat të nxehtë atje. Shumë politikanë e gazetarë kritikuan ashpër sjelljen e zyrtarit. Vetë Zaytsev u përpoq të justifikohej duke e quajtur reporterin një “provokues profesionist”.
Discussion about this post