Spitali i Lushnjës nuk disponon më gjak në “Bankën e Gjakut” të kësaj qendre spitalore, duke rrezikuar kështu jetën e rreth 200 të sëmurëve me talasemi, të cilët nuk plotësojnë nevojën për transfuzion.
Situata ka arritur deri në këtë pikë, që pas ndërprerjes së pagesave për dhurim gjaku.
Përveç kësaj, për të marrë këtë shërbim pacientët janë të detyruar të sorollaten nga një spital në tjetrin.
Gazetarët e Fiks Fare shkuan në spitalin e Lushnjës, ku mësohet se banka e gjakut në këtë institucion shëndetësor u shërben mbi 200 pacientëve me talasemi, të cilët nuk janë vetëm nga Lushnja dhe rrethinat e saj, por dhe nga Berati, Mallakastra, Elbasani, Kavaja dhe Fieri. Sipas nevojave, pacientët marrin gjak 1 ose 2 herë në muaj.
Mjekët e këtij spitali, tregojnë se në muajt e fundit ka rënë ndjeshëm numri i dhuruesve vullnetarë të gjakut, kjo edhe sepse nuk lejohet më “dhurimi me pagesë”.
Mjekët dhe pacientët japin alarmin se mungesa e flakoneve të gjakut shkakton probleme serioze te të sëmurët.
“Vajza ime e ka jetë të dytë. Kjo pasi është e theksuar mungesa e gjakut në spitalin e Lushnjës. Shumë herë kam ardhur me të dhe nuk ka mundur të marrë transfuzionin. Ajo vuan nga talasemia, por edhe nga komplikacione të tjera”, është shprehur një prind nga Berati.
Ky prind shton gjithashtu se ilaçet u janë caktuar t’i marrin në Tiranë.
“Nuk kemi mundësi ekonomike të shkojmë në Tiranë, të paktën të gjendet zgjidhje e t’i marrim në Lushnjë”, tregon beratsi.
Dr. Mehmet Xhindoli shprehet: “Çdo vit kemi marrë rreth 2500 njësi gjaku, por nevojat janë për 3500 të tilla”.
Në Qendrën Kombëtare të Gjakut në Tiranë marrin transfuzionin rreth 300 pacientë talasemikë. Mjekët theksojnë se bashkëpunojnë edhe me bankat e tjera të gjakut, por fillimisht plotësojnë nevojat për Tiranën.
“Kur bankat e gjakut të rretheve bëjnë kërkesë për të marrë flakonë gjaku, ne ato që teprojnë ua japim. Duhet theksuar se rreth 1% e popullsisë dhuron gjak, por për të plotësuar nevojat duhej të ishte dhurues gjaku 2% e popullsisë”, shpjegon QKGJ-ja.
Musa Zeneli, kreu i shoqatës së të sëmurëve me talasemi shprehet se pasojat mund të jenë fatale për të sëmurët me talasemi nëse ata nuk furnizohen me gjak sipas nevojave shëndetësore që kanë.
“Këta të sëmurë kanë nevojë për transfuzion gjaku të paktën një herë në 20 ditë. Për fat të mirë apo të keq unë jam anëtar i komisionit ‘për gjetjen e strategjisë për grumbullimin e gjakut’ dhe po ju them se Ministria e Shëndetësisë, që nga 2012 është mbledhur 2 herë. Ata nuk kanë më frikë as nga Zoti dhe as nga ligji. Ministria duhet të bëjë më tepër fushata sensibilizuese. Këto partitë politike, në vend që të organizojnë takime, duhet të bëjnë thirrje për dhurim vullnetar”, shprehet Zeneli.
Për të plotësuar nevojat e pacientëve për gjak, mjekët e Lushnjes punojnë duke lëvizur edhe në rrethe të tjera për të siguruar flakone gjaku.
Sipas tyre, kjo krizë mund të kapërcehej nëse çdo person i rritur dhe i shëndetshëm, do të dhuronte gjak qoftë një herë në vit.
Discussion about this post