“Heshtja nuk më bën kriminel. Heshtja është mbrojtja ime”. I dyshuari kryesor për organizimin e sulmeve terroriste në 2015 në Francë nuk pranoi të flasë gjatë për një gjykatë në Bruksel në një seancë kundër tij. Salah Abdeslam u mbrojt duke thënë se drejtësia belge nuk i trajton mirë muslimanët.
Sipas mediave ndërkombëtare 28-vjeçari tha vetëm se myslimanët “paragjykohen si të pamëshirshëm”, e shtoi se e lë besimin e tij në dorë të Allahut e Profetit Muhamed.
“Nuk kam frikë nga ju dhe nga aleatët tuaj. Muslimanët trajtohen në mënyrën më të keqe të mundshme, ku nuk supozohet pafajsia, por nuk kam frikë nga ju dhe aleatët tuaj. Kam besim në Zot” ishin fjalët e tij në sallën e gjyqit.
Abdeslam refuzoi t’iu përgjigjej pyetjeve të gjykatësve. I riu është shndërruar në personin më të kërkuar të Europës pas sulmeve në sallën e koncerteve “Bataclan”, stadiumin “Stade de France”, e disa restorante dhe bare të kryeqendrës së Francës, ku u vranë 130 vetë e u plagosën qindra të tjerë.
Përballja e Abdeslamit me një gjykatë franceze nuk pritet të ndodhë përpara vitit 2019. Akuzat që rëndojnë mbi të në Belgjikë nuk lidhen me ngjarjet tragjike të Parisit, ku i vëllai Brahim ishte një prej agresorëve, por me shkëmbimin e zjarrit që pati me forcat policore belge gjatë arratisë së tij.
28-vjeçari, shtetas francez i lindur në Bruksel nga prindër marokenë, është mbajtur deri tani në një burg pranë Parisit. Prej andej u largua mëngjesin e së hënës në shoqërinë e një numri të madh makinash policie, e do të kthehet në Francë çdo mbrëmje përgjatë 4 ditëve që pritet të zgjasë procesi gjyqësor.
(M.Q/Faxweb)
Discussion about this post