Vështirësitë e tyre nisën në vitin 2012-të kur një ndërtues privat i mashtron duke iu marrë banesën private me qëllim që të ndërtonte një pallat, dhe i strehon në një banesë me qira.
“Unë nuk shikoj mirë, firmosa disa letra me atë pronarin dhe ai tha do merrni një hyrje dy dhoma e kuzhinë. Deri sa të ndërtohet pallati, do na linin në shtëpi me qira”,rrëfeu kryefamiljari Andon Shkodra në emisionin “Me zemër të Hapur”.
Ata gjatë momentit që po ndërtohej pallati jetonin në një shtëpi me qera dhe gjatë kësaj kohe familja Shkodra e ka gjetur veten ngushtë me faturat e energjisë elektrike, që iu vinin super të larta, deri në 400 mijë lekë siç tregoi Andoni. “Fillimisht dyshova, se muajin e parë na erdhi fatura 20 mijë lekë, pastaj na vinte deri në 4000 mijë lekë. Shkova u ankova tek OSHEE, ato thanë që sahati është lexuar drejt. Pastaj mora kryeinxhinierin i cili konstatoi tre lidhje të tjera në sahatin tonë, të dy shtëpive dhe të një dyqani. E thirra administratorin dhe aty nisëm të bëjmë debat”,- tha Andoni.
Pas këtij momenti, kryefamiljari nuk e ka paguar më energjinë elektrike derisa Natën e Vitit të Ri, administratori ua ka ndërprerë energjinë. Por për t’ju mundësuar fëmijëve një festë si të gjithë, kryefamiljari ka bërë një veprim të jashtëligjshëm, duke e rilidhur vetë energjinë.
“Kur dola tek dera e pashë gruan të shtrirë në tokë, dhe ky e godiste me hekur në kokë. Më zuri gjaku e nuk durova dot më. Bëra sherr dhe e qëllova me grushte. Pastaj u mora me gruan se ishte shumë rëndë, e çova në spital”,- tregoi ai më tej.
Por pa kaluar shumë kohë, ai mëson se administratori e kishte paditur dhe kërkonte një dëmshpërblim prej 10 milionë lekësh prej tyre. Gjykata vendosi në favor të administratorit dhe kjo situatë e rrënoi edhe më tej gjendjen ekonomike të familjes
“Nuk kishim ç’të hanim, mamin e kishim të sëmurë nga koka. Unë braktisa shkollën, se filluan të më tallnin kur mësuan që punojë si kameriere. Pastaj edhe kam lypur…nuk kisha ç’të bëja tjetër”,- tregon me zë të ulët Sidorela, që sot është 19-vjeçe.
5 vjet më vonë nga kjo dramë që iu ka ndodhur anëtarët e familjes Shkodra kanë mbetur rrugëve, pa një strehë dhe në kërkim të drejtësisë. (J.V/Shuplaka)
Discussion about this post