Aktorja Ema Andrea ishte një nga kandidaturat më favorite deri në momentin e fundit për drejtore të Teatrit Kombëtar, e megjithatë në krye të institucionit u konfirmua Hervin Çuli.
Andrea përmes një postimi në Facebook është shprehur se teatri do jetë destinacioni i saj pavarësisht vendimit të kryeministrit.
Me një status ku ndjehet zhgënjimi i përzgjedhjes që autoritetet bënë për drejtorin e ri të teatrit, Andrea u shpreh mirënjohje kolegëve duke thënë se dorëzoi një platformë konkrete dhe tërësisht europiane.
“Edhe pse i Zoti i shtëpisë dhe firmëtarja vendosen tjetër gjë në drejtim të TK, u përulem me mirënjohje të gjithë kolegeve aktore dhe artistëve të rinj e me eksperience, brenda dhe jashtë Shqipërie që mbështeten kandidaturën time! Falënderoj miqtë e mi që me këshillat dhe ndihmën e tyre konkrete i dhanë platformës se paraqitur nga unë, plotësi profesionale dhe mua me bën të ndihem e lumtur që kam miq të vërtetë!
Genci Fuga e Laerti Vasili ju përshëndes e ju falënderoj qe ndatë me mua ketë rrugëtim të shkurtër e ju uroj suksese në skene! Destinacioni mbetet! Rrugët janë të ndryshme!”, shkruan Andrea. Duket se qëndrimet e saj publike në krah të artistëve që kërkonin mos shembjen e godinës së Teatrit Kombëtar, penalizuan Andrean nga rruga drejt postit të drejtores së Teatrit, për tu bërë e para femër që drejton këtë institucion që me krijimin e tij.
(E.K/FAXWEB.AL)
Discussion about this post