Emmanuel Macron ka dhënë arsyetimet e tij lidhur me veton e Francës për mos dhënien e dritës jeshille të hapjes së negociatave me Shqipërinë dhe Maqedoninë e Veriut, ndërsa ka ripërsëritur deklaratën e një dite më parë, se nuk ka një shpjegim për popullin e tij në rast se ai do të jepte një përgjigje pozitive për shtetin që është burim i azilkërkuesve.
Më tej duke iu referuar Shqipërisë, Macron deklaroi se pavarësisht diskutimeve Brenda Unionit, Franca nuk ndryshon qëndrim duke këmbëngulur se, BE ka nevojë për një reformim të brendshëm më shumë se sa për zgjerim, ndërsa ka dhënë edhe një mesazh për shqiptarët.
“Pikë së pari për Shqipërinë, është e vështirë t’ju shpjegojmë francezëve se do t’ju hapim negociatat duke qenë se konsiderohet si një vend i sigurt i azilkërkuesve me të cilët kemi problem. Nuk mund të bëjmë gjëra që për t’u kuptuar nga francezët janë të pamundura. Çështja e emigrimit nuk është vetëm fenomen që vjen vetëm nga Shqipëria. Janë probleme të cilat duhen rregulluar. Ka disa kushte të cilat nuk plotësohen, duhet gjetur zgjidhja e duhur që është e lidhur me principet tona. Kjo është një çështje për Shqipërinë e që duhet të zgjidhet por kjo nuk është arsyeja kryesore për qëndrimin e Francës. Nuk ka qenë aspak e lehtë për të gjetur edhe një zgjidhje me Britaninë për BREX-it. Po mundohemi të gjejmë një zgjidhje më të mirë.
Sa i përket çështjes së zgjerimit, diskutuam shumë dje me kolegët, kam bërë thirrje për koherencë. Nëse nuk ka funksionuar si duhet, vitet e ardhshme duhet të punojmë më tej për t’ju hapur dyert vendeve që aspirojnë. Duhet të ketë një koordinim. Nuk është moment për të bërë një zgjerim të mëtejshëm duke marrë parasysh vështirësitë me të cilat përballemi. Na duhet më shumë koherencë në mënyrë që të ngrihemi në të njëjtin nivel për ato që biem dakort. Duhet të jemi të hapur edhe për disa diskutime që i përket zgjerimit. Por më e rëndësishmë është se duhet të kemi një refomim që t’ju largohemi diferencave të viteve të mëparshme.
Ka pasur disa vende të cilat ishin kundër hapjes së negociatave. Janë vënë në pah përpjeket e dy vendeve kandidate. Patjetër që Zaev dhe Rama kanë bërë punën e tyre, të mos e gënjëjmë veten, kemi nevojë për progres në vendet tona pastaj të bëjmë përpjekjet për zgjerim. Le të mos gabojmë, në momentin që hapen negociatat ka një sërë çështjesh të tjera që duhen plotësuar. Duhet të jemi më efikas dhe të unifikojmë qëndrimet tona që ti ndihmojmë popujt e këtyre dy vendeve pasi nuk është vetëm çështja e hapjes së negociatave dhe dritës jeshile”, tha Macron.
(F.GJ/FAXWEB.AL)
Discussion about this post