I ftuar në studion e Fax News, këshilltari i kreut të Partisë Demokratike të Kosovës, Adri Nurellari, u shpreh se bilanci i Kosovës në 10-vjetorin e pavarësisë, vjen si lajm i mirë sepse sipas tij, vendi ia ka dalë të kapërcejë dekada prapambetjeje të shtetndërtimit. Kosova sipas Nurellarit ka kaluar sfidën e tranzicionit postkomunist dhe postcolonial.
“Kosova është rikompensuar në kohë të shkurtër dhe konkurron denjësisht me fqinjët që kanë 100 vite pavarësi. Kosova është rast suksesi. Të gjithë që kontribuan në pavarësinë e Kosovës, mund të jenë sot krenarë.
Ka demokraci funksionale që konsolidohet dita ditës. Në mes të krizës botërore të ekonomisë ka pas rritje rreth 4 %. Ka dëshmuar se e ka merituar mbështetjen ndërkombëtare për të realizuar pavarësinë.
Në çdo hap Kosova ka dëshmuar se ka ecur në krahun e drejtë. Dhunën e përdori në formën e luftës së armatosur vetëm kur i kishin shterruar mundësitë e tjera. Lufta për pavarësi ishte një luftë e drejtë dhe e ndershme. Jo më kot, përpjekja gjeti mbështetje gjerësisht tek ndërkombëtarët.
Pastaj, në fazën e negocimit është përpjekur të arrijë konsensusin maksimal me të gjithë faktorët në përgatitje të shpalljes së pavarësisë.
Edhe pse ka pas pengesa, pas shpalljes së pavarësisë, Kosova ia ka dalë të konsolidojë shtetin e vet. Kosova është anëtarësuar në 70 organizata ndërkombëtare, komuniteti serb është integruar shumë mirë politikisht. Sot Kosova aspiron të bëhet anëtare e BE dhe NATO-s.” – ka thënë këshilltari i kreut të PDK
(E.L./Faxweb)
Discussion about this post