Nxjerr foton me përshëndetjen ushtarake, Meta: Sot është dita për Referendumin e ri!

Presidenti i vendit Ilir Meta përmes një postimi në rrjetet sociale, këmbëngul se vendi ka nevojë për një Referendum të ri.

Duke nxjerrë një foto të Kushtetutës, dhe të tijën, duke përshëndetur një prej gardistëve që ndodhen në presidencë, Meta shprehet se sot ka ardhur koha për një referendum të ri.

“Sot është dita e Referendumit të tradhtuar. KOHA PËR REFERENDUM TË RI!”

Burime nga presidenca bëjnë me dije se gjatë ditës së sotme, do të jetë vetë Meta që do të bëjë publik dhe temën e Referendumit, për të cilën pritet që të nisë dhe mbledhjen e firmave të qytetarëve.

Por si mund të shkohet drejt një referendumi dhe çfarë parashikon Kushtetuta e Shqipërisë?

E drejta për të shkuar në Referendum është e sanksionuar në nenin 150 të Kushtetutës së Shqipërisë, ku të drejtën për ta kërkuar e kanë  50,000 qytetarë me të drejtë vote dhe/ose 1 të pestat e anëtarëve të Kuvendit.

Duke parë se për momentin presidenti Meta nuk mund të marrë mbështetjen e deputetëve të Kuvendit, mesiguri ai do të zgjedhë që t’iu drejtohet qytetarëve, për të marrë 50 mijë firmat e tyre, në mënyrë që të iniciojë një referendum, ku fokus kryesor sipas tij do të jetë mbrojtja e Kushtetutës së vendit.

Ndërkohë rëndësinë e demokracisë direkte përmes referendumit e ka parashikuar dhe Asambleja Parlamentare e Këshillit të Evropës, e cila ka rekomanduar përdorimin e referendumit, si një mjet për të përforcuar legjitimitetin demokratik të vendimeve politike si dhe për të rritur përgjegjshmërinë e institucioneve përfaqësuese. Gjithashtu Komisioni i Venecias e ka cilësuar referendumin si balanca kundër partitokracisë.

(E.K/Faxweb.al)