Nxorën naftë nga anija që ishte sekuestruar në Porto Romano, arrestohet polici, 2 në kërkim

Agjencia e Mbikëqyrjes Policore ka arrestuar një punonjës policie dhe ka shpallur në kërkim dy persona të tjerë.

Arrestimi i punonjësit të patrullës së përgjithshme të Policisë dhe shpallja në kërkim e dy peronave është bërë për arsye se në bashkëpunim me njëri-tjetrin, më datë 27 janar, rreth orës 15:00, ata kanë bërë nxjerrjen e një sasie të konsiderueshme nafte nga Anija “AYAZANOYBYA” me flamur të Tanzanisë, që ishte ankoruar dhe sekuestruar në Porto Romano, e cila ka qënë sekuestruar në cilësinë e provës materiale nga Prokuroria Durrës.

Nga hetimet e kryera nga AMP dhe Seksioni për Hetimin e Krimeve Ekonomike e Financiare në DVP Durrës ka rezultuar se punonjësi i policisë A. M., ka lejuar kundrejt pagesës prej 10,000 euro, të dhënë nga shtetasi J. K., nxjerrjen e sasisë së naftës të ndodhur në anije, në bashkëpunim me pjesëtarë të ekuipazhit.

Gjithashtu, në bashkëpunim janë kryer të gjitha veprimet proceduriale, duke përfshirë ri-këqyrjen e anijes, këqyrjen e pamjeve filmike në Porto Romano Durrës, marrje deklarimesh dhe marrjen e mostrave për ekspertim në të gjithë zonat e balastarve dhe ka rezultuar se sasia e naftës që ndodhej në këto hapësira në momentin e sekuestrimit (datë 12.01.2025) ishte zëvendësuar me ujë.

“Në vijim të veprimeve, janë proceduar në gjendje të lirë 7 shtetas, të dyshuar për “Kontrabanda me mallra që paguhet akcizë me pezullim të plotë ose të pjesshëm nga detyrimet doganore”, “Vjedhje e kryer në bashkëpunim”, si më poshtë;

1. L. K., 29 vjeç
2. ⁠ F. I., 23 vjeç (shtetas sirian)
3. ⁠A. Sh., 22 vjeç (shtetas sirian)
4. ⁠ S. Sh., 25 vjeç (shtetas sirian)
5. ⁠ H. B., 47 vjeç (shtetas sirian)
6. ⁠S. B., 53 vjeç (shtetas egjyptian)
7. ⁠Ë. B., 42 vjeç (shtetas sirian)”, njofton AMP.