Kanë kaluar plot 10 ditë që nga dita kur Parlamenti mori vendimin të kthejë procesin e rivlerësimit për kandidatët e organeve të Vettingut, mirëpo deri më tani ende nuk ka nisur asnjë veprim për verifikimin e aplikantëve të kualifikuar, por që u mungon dokumentacioni.
Televizioni Top Channel raporton se është Avokati i Popullit që i ka bërë rezistencë Kuvendit për të marrë dosjet në dorëzim, të cilat janë verifikuar që të hënën.
Megjithatë, pavarësisht marrjes në dorëzim të dosjeve, Avokati i Popullit ende nuk ka nisur procesin e verifikimit, madje nuk ka hapur as thirrjen për kandidatë të rinj.
Avokati i Popullit e sqaron këtë me argumentin se më parë i duhet të inventarizojë çdo dokument që gjendet në secilën prej dosjeve. Pasi kështu asnjë prej aktorëve të përfshirë në proces, të mos mundet të ketë pretendime për korrektësinë e procedurave të kryera nga ky institucion.
Procesi i verifikimit të kandidatëve aktualë për organet e Vettingut dhe thirrjes për kandidatë të rinj, pritet të hapet të hënën. Por duke llogaritur kohën që mund të marrin vëzhguesit ndërkombëtarë, ky proces mund të rikthehet në Parlament në fillim të prillit. (D.D/Shuplaka)
