Oficerja e padit për goditje, studentja fiton gjyqin ndaj saj

Një studente u padit nga një oficere për “ goditje për shakak të detyrës” , ndërsa sot ajo ka fituar gjjyqin ndaj saj duke e konsideruar si të padrejtë padinë ndaj saj.

Prokuroria dhe Gjykata nuk kanë pranuar të hapin çështje penale në lidhje me padinë e oficeres së Policisë me iniciale D.B. Kjo e fundit, më 9 qershor 2016, ka shkuar në Komisariatin e Policisë nr.1 në Tiranë dhe ka deklaruar se punon prej një viti si punonjëse policie pranë postës së Policisë në Qytetin Studenti, Tiranë.

Në datën 09.06.2016 ka shkuar në punë turni i dytë dhe si zakonisht në orën 14:00 ka dalë për kontroll territori së bashku me një koleg të saj në zonën që ata mbulojnë, Qytetin Studenti. Gjatë kontrollit, rreth orës 14:25, kanë konstatuar një mjet, i cili sipas polices, ishte parkuar në mënyrë të gabuar. Policët kanë marrë masë administrative duke i vënë një gjobë prej 1 mijë lekësh pa prezencën e drejtuesit dhe janë nisur për të kontrolluar territorin.

Oficerja pretendon se nga pas u është afruar një femër duke i fyer e ofenduar punonjësit e policisë me fjalë banale, ndërkohe që efektivat blu i kanë kërkuar të qetësohet pasi ajo kishte parkuar makinën në mënyrë të gabuar. Por drejtuesja e mjetit nuk u është bindur dhe pasi u ka marrë bllokun e gjobave policëve me argumentin për ta firmosur, i ka vendosur një kryq të madh bllokut dhe ka shkruajtur “s’ka tabelë” dhe më pas ia ka hedhur në fytyrë punonjëses së policisë, duke e ofenduar me fjalë dhe në atë moment e ka shtyrë me duar në shpatulla.

Të njëjtat rrethana ka përshkruar edhe polici që ndodhej me oficeren që ngriti padinë, ndërsa është shoqëruar në komisariat edhe drejtuesja e mjetit. Policja ka bërë ekspertim mjekoligjor ku ka dalë se kishte skuqje në pjesën e fytyrës dhe të shpatullave të klasifikuara nga mjekësia ligjore si rrahje.

DËSHMIA E VAJZËS

Në deklarimin e saj, shtetasja nën hetim ka shpjeguar se është e vërtetë që ka debatuar me punonjësen e policisë për gjobën e vënë sipas saj në mënyrë të padrejtë, por nuk pranon të ketë kryer veprime dhune ndaj saj. Ajo shprehet se aty ka parkuar përditë, pasi nuk ka tabelë që e ndalon atë gjë dhe në momentin kur ka konstatuar gjobën, thjesht ka kërkuar bllokun e gjobave për të vënë shënimin e saj, që nuk ishte dakord me atë masë administrative. Ka bërë shënimin te gjoba, duke i vënë edhe një kryq, por veç debatit me fjalë, nuk ka kryer asnjë veprim tjetër dhe ka shkuar në ambientet e fakultetit.

VERIFIKIMI NË TERREN

Gjykata konstaton ndërkohë se nga verifikimi i kryer në terren në vendin e parkimit të mjetit nga e dyshuara, edhe sipas tabelës fotografike të administruar, rezulton se mungon sinjalistika rrugore si ndalim parkimi etj., për të cilën mund dhe duhej të vihej gjobë nga efektivat e policisë me cilësinë e punonjësve të rendit.

“Njëkohësisht edhe sipas procesverbalit të konstatimit të shkeljes bërë nga kallëzuesja, rezulton se gjoba është vënë jo në praninë e të dyshuarës, ‘jo prezent’, ndërkohe që sipas nenit dhe ligjit për të cilin është vënë gjoba, duhet patjetër prezenca e drejtuesit të mjetit”, thuhet në vendimin e Gjykatës. Kjo e fundit dhe Prokuroria kanë vendosur pushimin e çështjes. (S.SH/Shuplaka)