Aktorja Olta Gixhari ka arritur të fitojë gjyqin me vajzën e deputetit socialist Dashamir Peza, Amantia. Bëhet fjalë për një proces gjyqësor i nisur pas padisë të ngritur nga aktorja ndaj Shoqërisë “Pik Creative SHPK” (aksionere e së cilës është Amantia Peza).
Rreth një vit më parë, Gixhari denoncoi në Gjykatën e Tiranës se kjo shoqëri nuk e kishte paguar për reklamën që ajo kishte bërë për një kompani celulari tre vite më parë.
Në padi, Gixhari kërkonte “Përmbushjen e detyrimit kontraktor, për të paguar pjesën e papaguar prej 6410 euro, sipas kontratës së shërbimit që mban datën 24.09.2014, të lidhur nëpërmjet paditëses dhe të paditurit si dhe kamatat ligjore për vonesën e pagesës deri në momentin e ekzekutimit të vendimit. Detyrimin e të paditurit të paguajë shpenzimet gjyqësore”.
Pavarësisht se gjykata nuk i pranoi të gjitha kërkesat e Gixharit, ajo ka fituar pjesërisht të drejtën për pretendimet e ngritura.
“Gazeta Shqiptare” shkruan se në vendimin e siguruar nga “Bluetooth”, gjykatësja Anila Karanxha ka kërkuar “Detyrimin e palës së paditur Shoqëria ‘PIK Creative’ SHPK, që t`i paguajë paditëses Olta Gixhari shumën prej 5475 (pesë mijë e katërqind e shtatëdhjetë e pesë) euro bruto si detyrim që rrjedh nga kontrata e shërbimit më datë 24.09.2014, e lidhur midis paditëses dhe palës së paditur”.
Amantia Peza është pronare e kompanisë së reklamave “Anima Picture”, të cilës i është bashkuar edhe kompania “Pik Creative”, me të cilën kishte pasur kontratën Gixhari. Ende nuk dihet nëse shoqëria e reklamave e ka ankimuar vendimin e gjykatës apo ka zgjedhur të dëmshpërblejë aktoren.
(XH.A/SHUPLAKA)
Discussion about this post