Zëvendësministrja e Ekonomisë, Olta Manjani, mirëpriti të rinjtë në një aktivitet të veçantë të zhvilluar në ambientet e Piramidës, tashmë një simbol i informacionit dhe teknologjisë në Shqipëri dhe një qendër socializimi për brezin e ri. Aktiviteti ishte i dedikuar programit profesional “Kodini”, një nga nismat më të mëdha në fushën e kodimit dhe teknologjisë në vend.
Në fjalën e saj, znj. Manjani theksoi se qeveria nuk kujdeset vetëm për ndërtimin e infrastrukturës, por edhe për përmbajtjen – duke investuar në kapitalin njerëzor si bazë për zhvillimin afatgjatë. Ajo vuri në dukje se programi “Kodini” është një shembull i qartë i këtij angazhimi, i cili mbështetet nga buxheti i shtetit.
Të gjithë të rinjtë pjesëmarrës në këtë program kanë ndjekur kurse profesionale të subvencionuara në masën 50% nga qeveria, ndërsa për punëkërkuesit është ofruar mbështetje e plotë, me 100% subvencion. Ky investim synon jo vetëm rritjen e aftësive teknologjike të të rinjve, por edhe përgatitjen e tyre për tregun e punës dhe përfshirjen aktive në zhvillimin e ekonomisë dixhitale të vendit.
