Operacioni “Blici Rrugor” u mbajt sot në 12 qarqe të vendit , në akset kryesore dhe zonat urbane në sajë të Policisë Rrugore të mbështetur nga Patrullat e Përgjithshme dhe Shqiponjat. Kjo në kuadër të rritjes së parametrave të sigurisë rrugore.
Ky operacion nisi në orën 13:00 dhe zgjati deri në orën 14:00 dhe u angazhuan rreth 760 punonjës policie në total, ndërsa u ngritën dhe funksionuan 150 pika kontrolli në të gjithë vendin.
Sipas policisë janë janë ndëshkuar me masë administrative 610 drejtues mjetesh dhe pasagjerë, nga të cilët 268 qytetarë për mosvendosje të rripit të sigurimit, (drejtues mjetesh e pasagjerë). 184 drejtues mjetesh për përdorim të celularit gjatë drejtimit të mjetit si dhe 158 drejtues mjetesh për shkelje të tjera, si shpejtësi tej normave të lejuara, për mosvendosje të kaskës mbrojtëse etj.
Operacioni ka për qëllim rritjen e parametrave të sigurisë rrugore, ndërgjegjësimin e qytetarëve për rëndësinë e vendosjes së rripit të sigurimit, për mos përdorimin e celularit gjatë drejtimit të mjetit, por edhe të respektimit të rregullave të qarkullimit rrugor në tërësi. Po kështu Blici Rrugor do të vijojë çdo ditë në të gjithë vendin. (J.V/Shuplaka)
