Policia e Korçës ka finalizuar me sukses një tjetër operacion për goditjen e veprimtarisë kriminale të shpërndarjes së lëndëve narkotike në qytet. Operacioni i koduar “Next”, i zhvilluar nga specialistët e Seksionit për Hetimin e Narkotikëve në bashkëpunim me forcat “Shqiponja”, ka çuar në prangosjen e tre shtetasve, mes tyre një çift bashkëshortësh, të dyshuar për shitje të kokainës dhe kanabisit në doza të vogla.
Të arrestuarit janë:
-
Z. Ç., 55 vjeç, banues në Korçë;
-
J. Ç., 43 vjeçe, bashkëshortja e Z. Ç.;
-
O. Sh., 36 vjeç, gjithashtu banues në Korçë, i dënuar më parë për të njëjtën vepër penale.
Gjatë operacionit në lagjen nr. 4 të qytetit, Policia ka ndaluar një automjet në të cilin ndodheshin Z. Ç. dhe O. Sh. Gjatë kontrollit të mjetit dhe kontrollit fizik ndaj tyre, u gjetën doza të kokainës dhe një shumë parash e dyshuar si e përfituar nga shitja e drogës.
Kontrollet janë shtrirë edhe në banesat e të ndaluarve, ku janë sekuestruar dhjetëra doza kokainë gati për shitje, 2 peshore elektronike dhe sende të tjera të dyshuara si prova materiale. Gjithashtu, në ambientet e një parukerie në pronësi të shtetases J. Ç., është gjetur sasi kanabisi e ndarë në doza të gatshme për tregtim.
Në total, Policia ka sekuestruar:
-
Dhjetëra doza kokainë dhe kanabis;
-
Dy automjete;
-
Tre aparate celularë;
-
Një shumë parash të dyshuar si e përfituar nga veprimtaria kriminale.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore.
Operacioni “Next” vjen në kuadër të angazhimit të Policisë së Shtetit për të luftuar shpërndarjen e lëndëve narkotike dhe për të garantuar rendin e sigurinë në komunitet.
