Misioni vëzhgues i OSBE/ODIHR ka nisur zyrtarisht punën për monitorimin e zgjedhjeve në Shqipëri. Drejtuesi i misionit, Lamberto Zannier, njoftoi se gjatë procesit do të vlerësohet përputhshmëria e zgjedhjeve me angazhimet ndërkombëtare dhe legjislacionin vendas.
Për ditën e zgjedhjeve, pritet të mbërrijnë në Shqipëri 300 vëzhgues afatshkurtër, ndërsa do të ketë përfaqësues nga Asambleja Parlamentare e OSBE, Këshilli i Europës dhe Parlamenti Europian. Misioni do të monitorojë të gjitha aspektet e procesit zgjedhor, përfshirë kuadrin ligjor, administrimin e fushatës, mbulimin mediatik dhe transparencën në rrjetet sociale.
Gjithashtu, ai tha se do të zhvillohen takime me përfaqësues të institucioneve shtetërore, partive politike, shoqërisë civile dhe komunitetit ndërkombëtar.
“Sot hapim zyrtarisht misionin e vëzhgimit të zgjedhjeve të OSBE-ODIHR. Për ditën e zgjedhjeve do të kërkojmë 300 mbikëqyrës afat shkurtër që do të vijnë në Shqipëri pak para zgjedhjeve. Në ditën e zgjedhjeve do të ketë një komponent më të gjerë të vëzhguesve, vëzhgues nga Asambleja Parlamentare e OSBE, Asambleja Parlamentare e KiE dhe Parlamenti Evropian. Qëllimi i këtij misioni do të jetë vlerësimi i kryerjes së këtij procesi, nëse do të jenë në përputhje me angazhimet e Shqipërisë ndaj OSBE-së dhe detyrime të tjera të Shqipërisë, si edhe përputhja me legjislacionin vendas. Do të monitorojmë nga afër të gjitha aspektet e zgjedhjeve, si kuadri ligjor, zbatimi i fushatës edhe në rrjetet sociale, puna e administratës zgjedhore në të gjitha nivelet, mosmarrëveshjet dhe mbulimi mediatik në përgjithësi. Si pjesë e këtij procesi do të jenë edhe takime me përfaqësues të shtetit, partive politike, shoqërisë civile, medias dhe faktorit ndërkombëtar”, u shpreh Zannier.
