Një ditë më parë Kryeministri Edi Rama deklaroi se do të falen kamatvonesat e energjisë elektrike për familjet në nevojë. Në vijim të kësaj, administratori i OSHEE-së Adrian Çela, ka dalë në një njoftim për mediat për të sqaruar për mënyrën se si do procedohet.
Çela deklaroi se vetëm konsumatorët korrektë do të përfitojnë nga reduktimi i kamatvonesave.
“Që në krye të herës dua të nënvizoj se nga këto masa lehtësuese përfitojnë vetëm ata konsumatorë që janë treguar korrekt me respektimin e aktmarrëveshjeve të firmosura me OSHEE. Pra, kanë paguar rregullisht faturën mujore dhe këstin e shlyerjes së borxheve të prapambetura”, tha Çela.
Sipas kreut të OSHEE-së, janë plot 126,000 abonentë në total ata që përfitojnë reduktim kamate deri në zerim të plotë të saj, me efekt financiar 155 milionë dollarë.
Nga këta, 66539 janë pensionistë, invalidë dhe ndihmë ekonomike që kanë aktmarrëveshje me të cilat paguajnë sot shlyerjen e borxhit me këste 1000 ose 1200 lekë/muaj.
Ndërsa 59461 të tjerë janë konsumatorë familjarë që kanë paguar rregullisht këstet prej 2500, 2800 lekësh/muaj.
Çela sqaroi, se çdo abonent i kategorisë së parë, pra pensionistët, invalidëve apo ata në ndihmë ekonomike do duhet të paraqiten në sportelet e OSHEE me librezën përkatëse. Këta abonentë do paguajnë vetëm shumën simbolike prej 20 lekësh dhe stafi i OSHEE do i bëjë zerimin e plotë të vlerës së kamatës. Pas kësaj, abonenti do të vazhdojë të shlyejë detyrimin që mbetet pas zerimit të kamatës.
Ndërsa abonentët e kategorisë së dytë, pra konsumator familjar që nuk bën pjesë në skemat sociale do paraqiten gjithashtu në sportelet e OSHEE gjithashtu me librezën përkatëse. Këta qytetarë do të paguajnë këstin e radhës dhe do t’i reduktohet me 80% vlera e kamatëvonesës.
Afati i kryerjes së këtij procesi ka filluar që sot dhe do zgjasë deri në qershor të 2017-ës. (D.D/Shuplaka)
Discussion about this post