Komisioni për Veprimtarinë Prodhuese miratoi sot marrëveshjen e huasë ndërmjet Operatorit të Shpërndarjes së Energjisë Elektrike (OSHEE) dhe Bankës Evropiane për Rindërtim dhe Zhvillim (BERZH) për projektin e qëndrueshmërisë së OSHEE-së.
Zëvendësministri i Financave, Florian Semani, i pranishëm në komision, bëri të ditur se ky projektligj i mundëson mbështetje me garanci shtetërore Operatorit të Shpërndarjes së Energjisë Elektrike për marrjen e një huaje me kushte të favorshme nga BERZH-i në vlerën 45,75 milionë euro.
Me këto fonde, OSHEE do të rifinancojë kreditë me kufi overdraft që ka aktualisht me bankat e nivelit të dytë, të cilat janë marrë në vitin 2021 dhe kanë një vlerë totale prej 81,5 milionë euro. Këto kredi janë rinovuar çdo vit dhe janë ende aktive. Pas negociatave me bankat dhe pas dakordësisë me Ministrinë e Financave, u arrit që kushtet e rifinancimit të përmirësoheshin, duke mundësuar marrëveshjen me BERZH-in për një kredi afatgjatë me kushte më të favorshme.
Ministria e Financave ka kërkuar nga OSHEE që të marrë masa për të mundësuar rifinancimin e pjesës që mbetet nga kreditë me kushte më të mira dhe për të shqyrtuar mundësinë e ristrukturimit të overdraft-eve afatshkurtër në kredi afatgjatë. Pas diskutimeve mes OSHEE-së dhe BERZH-it, u arrit në përfundimin se kushtet e ofruara nga BERZH-i ishin më të favorshme se ato nga bankat vendase.
Në këto kushte, BERZH-i pranoi të ndajë me rreth 50% të fondeve të kredisë afatgjatë me bankat tregtare vendase, që kanë kontratat e kredisë overdraft me shoqëritë e grupit, si dhe angazhimin për të financuar pjesën e mbetur të kredisë, për të siguruar një balancë financiare më të qëndrueshme në tregun vendas.
Ky financim i miratuar për OSHEE-në në vlerën 45,75 milionë euro përbën një detyrim të drejtpërdrejtë për Operatorin e Shpërndarjes së Energjisë Elektrike ndaj BERZH-it.
Në rast të pamundësisë për të shlyer detyrimet, kredia do të paguhet nga buxheti i shtetit, mbështetur nga marrëveshja e garancisë.
