Operatori i Shpërndarjes së Energjisë Elektrike ka kallëzuar penalisht një firmë private, të cilën e akuzo se ka lënë pa drita 30 fshatra duke dëmtuar dy nënstacione. Mësohet se subjekti privat ka dëmtuar mëngjesin e sotëm kabllin 35kV i linjës L30-1 Kinostudio-Lanabregas.
Dëmtimi i kabllit ka ndodhur ndërkohë që firma private B93 po punonte për llogari të ujësjellësit, pranë Fizikës Bërthamore. Për pasojë, kanë dalë jashtë pune dy nënstacionet, Lanabregasi dhe atë të Qafë-Mollës.
Për rreth 3-4 orë, kanë mbetur pa energji elektrike rreth 40.000 banorë të 30 fshatrave të Tiranës, si: Lanabregas, Bregas, Linzë, Linzë Deli, Surrel, Priskë, Fushë Farkë, etj, Antenat e televizioneve ne Dajt, Vilat Qeveritare në Dajt, etj, si dhe subjekte të private (Teleferiku, etj).
Kryenxhinieri i Drejtorisë së Tensionit të Lartë për Tiranën, Egert Mema ka bërë me dije se pas konstatimit të dëmit, OSHEE ka thirrur policinë me qëllim hetimin e ngjarjes dhe mbledhjen e provave.
“Ky është rasti i 15 për muajin dhjetor vetëm në Tiranë, pra mesatarisht çdo ditë nga një dëmtim. Kompania ka punuar jashtë rregullave të kushteve teknike, pa marrë azhornimet dhe kodet e rrjetit nga OSHEE. Abonentët po marrin energji nga linjat e tjera unazore”, është shprehur ai.
Discussion about this post