Kreu i opozitës Lulzim Basha ka qenë i pranishëm ditën e sotme në qytetin e Beratit për të çelur fushatën elektoralle. Ai ka prezantuar dy nga kandidatët që kryesojnë listën në qytetin e Beratit: Eduard Halimi dhe Astrit Veliaj.
Lista e Beratit është plotësuar sot me të tjerë kandidatë që do ti bashkohen fushatës në ditët në vijim. Kujtojmë se nga lista e Beratit është tërhequr aktivisti Sazan Guri dhe është në dilemë i treti i listës Lefter Maliqi.
Në fjalën e tij Basha pyeti qytetarët se çfarë i ka sjellë vendit qeverisja e Ramës. Ai tha se në këto katër vite janë shpenzuar më shumë për fasadat dhe pensionistët janë lënë me ‘’gisht në gojë’’.
‘’Kryeministri i Republikës së Re, unë do të jem kryeministri i njerëzve të zakonshëm të këtij vendi, kryeministri i halleve tuaja, do të punoj ditë për ditë për vendin, plani im për ekonominë ka vulën e ekspertëve gjermanë të partisë së kancelares gjermane Angela Merkel.
Unë do të investoj te Bujqësia shqiptare pasi ajo mban me bukë 47% të shqiptarëve. 10 mijë të rinj shqiptarë do të kenë të garantuar stazhin, kjo është ura që do të ndërtoj unë, nuk është si Ura e Varur’’, u shpreh Basha.
‘’Do jem kryeministri i qytetarëve, do jem gjithmonë pranë jush. Dhimbjen tuaj e kam prekur e kam ndjerë duke qenë afër jush. Do jem kryeministri i taksave të ulëta, i investimeve. Prioriteti im i parë do jetë hapja e fabrikave në Berat, në të gjithë Shqipërinë.
Rruga e Kombit, heqja e vizave, asgjë nuk erdhi dhuratë, ishin vendime të vështira. Para dy ditësh mora të tjera vendime të vështira, por të domosdoshme. Ishte koha për t’i marrë këto vendime, nuk i heq as presjen. Ndaj merrni vendimin tuaj.
Bashkohuni të gjithë në bashkimin më të madh të Republikës së re. Merreni Beratin në dorë, merrni vendimet tuaja. Unë iu premtoj se do të marr vendimet e mia për gjithësecilin prej jush’’, vijoi më tej Basha.
(E.K/SHUPLAKA)
Discussion about this post