77-vjeçari Dashamir Koçaj ka humbur jetën tragjikisht, gjatë kohës që po transportohej në Tiranë, pasi ambulanca në të cilën gjendej është përplasur nga një kamion i drejtuar prej 31-vjeçarit Leonard Gjini, i cili është shoqëruar në polici.
Aksidenti fatal ka ndodhur në kryqëzim të autostradës Lushnjë-Fier, në vendin e quajtur “Rotondo e Savres” pak orë pas mesditës së datës 17 shtator.
Të lënduar kanë mbetur drejtuesi i ambulancës Flori Ramo 54 vjeç, infermieri, Elvis Banushaj 33 vjeç dhe vajza e 77-vjeçarit, 37-vjeçarja me inicialet E.A, të cilët janë dërguar në spital.
Sipas informacioneve, mjeti tip kamion “ICECO” me targa AA288UR ka hyrë në parakalim pranë shesh pushimit në Savër duke tentuar të dalë përpara ambulancës, por nuk ia ka arritur të shmangë përplasjen.
Grupi hetimor ndodhet në vendngjarje dhe nën drejtimin e Prokurorit po vijon veprimet për përcaktimin e shkakut të aksidentit si edhe po kryen veprimet procedurale me 2 drejtuesit e automjeteve.
(Xh.H/FaxWeb.al)
