Ministri i Shëndetësisë Ilir Beqaj ka publikuar rastin e një pacienteje nga Berati, e cila që prej vitit 2003 sorollatej për të marrë shërbimin e hemodializës.
Por sipas Beqajt, falë partneritetit publik-privat më në fund ajo mund ta marrë këtë shërbim edhe në qytetin e saj.
“Ja si Rilindja, me programet e Shëdetësisë FALAS, po rilind shpresën e njerëzve në nevojë!
Matilda Telhaj është një nga 950 qytetarët në nevojë për hemodializë, të cilët përfitojnë tashmë pranë vendbanimit një shërbim shembullor publik dhe pa asnjë qindarkë kosto shtesë për shtetin, i cili jepet sot FALAS falë parteritetit shtet-privat!
Nga një shërbim me kushte mjerane dhe të degraduara, shërbimi i Hemodializës, një proces jetik për pacientët që duhet ta kryejnë atë, ofrohet tashmë në kushte moderne dhe me standarde europiane edhe në Berat dhe Shkodër, duke lehtësuar për qytetarët barrën e shpenzimeve dhe kursyer kohën e udhëtimit dhe mundimin për në QSUT “Nënë Tereza” në Tiranë, Fier apo jashtë vendit. Falë partneritetit me privatin, këtë shërbim e ofruam për herë të parë edhe në Lezhë dhe Vlorë, dhe shumë shpejt fillojmë edhe në Elbasan dhe në Korçë.”, shkruan ministri.
Në një video të publikuar nga ministri Beqaj, vetë pacientja Matilda Telhaj rrëfen mundimet që ka përjetuar përgjatë këtyre viteve për të marrë një shërbim të vetëm, dhe tregon se si ky projekt i mundësuar nga Ministria e Shëndetësisë i ka kursyer asaj shumë mundim por edhe shpenzimet.
