Presidenti i AKR-së, Behgjet Pacolli është takuar ditën e sotme me liderin e AAK-së Ramush Haradinaj, i cili është gjithashtu kandidat i koalicionit PAN për kryeministër.
Lajmin e ka bërë të ditur zyrtari i AAK-së, Muharrem Nitaj, i cili ka theksuar se takimi është mbajtur në shtëpin e Pacollit ku është diskutuar për krijimin e institucioneve të reja.
“Po ka pasur një takim ndërmjet z.Haradinaj dhe kryetarit të AKR-së, Behgjet Pacolli në shtëpinë e këtij të fundit. Ka qenë një takim konstruktiv, një takim shumë miqësor dhe tema e vetme e këtij takimi ka qenë krijimi i institucioneve të vendit kjo në frymën e situatës së krijuar politike në vend”, ka thënë Nitaj.
Ndër të tjera, Nitaj ka theksuar se ka pasur një dakordim ndërmjet Haradinajt dhe Pacollit se vendi ka nevojë urgjente për krijimin e institucioneve të reja.
I pyetur rreth asaj se a ka pasur ndonjë marrëveshje për ndonjë bashkim të mundshëm të AKR-së me PAN-in, Nitaj ka thënë se “nuk mund të spekulojë më tepër për rezultatet e këtij takimi sepse ka pasur mjaftë spekulime”.
Gjatë ditës së sotme, Pacolli është takuar edhe me kandidatin për kryeministër nga radhët e Vetëvendosjes, Albin Kurti. (D.D/Shuplaka)
