Ditën e sotme u publikua në media denoncimi i një qytetari kundrejt Arkivave të Shtetit, dhe drejtuesit Ardit Bido, pasi sipas tij kishin arkivuar dokumente të falsifikuara. (LEXO KETU)
Sipas denoncuesit Arben Myzeqari, ”me vendimin e Ardit Bido, drejtor i Përgjithshëm i Arshivës së Shtetit, një Akt Pronësie i vitit 1921, i falsifikuar është depozituar në arshivën e Arkivit Qendror të Shtetit, sipas vendimit të firmosur nga Ardit Bido, datë 25 janar 2019 me numër protokolli 877/2. Drejtori i Përgjithshëm i Arkivës Qendrore të Shtetit, Ardit Bido, e firmos shkresën e pranimit të një dokumenti pronësie të falsifikuar, i ndërgjegjshëm që është i falsifikuar. Motivet pse e pranon, Ardit Bido duhet t’i japë në gjyq përpara drejtësisë”.
Po kjo deklaratë është kundërshtuar nga vetë zyra e arkivave dhe drejtuesi Ardit Bido, i cili deklaron se e gjitha kjo është bërë për të prishur imazhin e institucionit që ai drejton. Sipas Bidos nga viti 2017 çdo dokument që arkivohet kalon eksperizën e Policisë Shkencore.
Reagimi i Bidos:
Hajd e merre vesh
Para se të nisja punë në arkiv, çdo dokument pranohej batjava pa kontroll origjinaliteti. Sot, me vendim unanim, çdo dokument pronësor merret pasi është bërë ekspertiza nga Policia Shkencore. Dhe sot, si për habi, një media bën turfullim pse ne i kontrollojmë dokumentet në ndryshim nga më pare. Këtu vjen kakofonia mediatike: prishje imazhi se i do qejfi dikujt, sepse shpifja ngjit, pavarësisht sa gram vërtetësie ka.
Deklarata e plotë e DPA!
Drejtoria e Përgjithshme e Arkivave dëshiron të sqarojë opinionin publik se çdo dokument i dhuruar në AQSH, me përmbajtje të dhëna pronësore, prej vitit 2017 duhet të kalojë më përpara për verifikim nga Instituti i Policisë Shkencore. Kjo procedurë e re vjen për të garantuar që çdo dokument pronësor që dhurohet në arkiv të jetë i provuar mbi origjinalitetin e tij.
Deri në vitin 2017, këto dokumente pranoheshin pa asnjë verifikim të mëtejshëm, pasi ky nuk është detyrim ligjor, por një masë e marrë me vendim të DPA-së për të krijuar garancinë e procesit. Ne jemi të bindur se ky vendim ka lënë shumë të pakënaqur, që e shihnin rrugën e mëparshme si rrugën e shpejtë të falsifikimit të pronave. Për këtë, ne nuk presim asnjë lëvdatë, e njëherazi kemi marrë parasysh që mund të ketë sulme, sipas parimit „hajduti bërtet: kapni hajdutin“! Mirëpo, për aq kohë sa u shërbejmë qytetarëve me përkushtim e paanësi, këto sulme nuk mund të na ndalojnë!
Për sa më sipër, Drejtoria e Përgjithshme e Arkivave ndihet e detyruar të denoncojë publikisht shpifjen në numrin e sotshëm të gazetës „Telegraf“, për disa arsye:
Komisioni i Përhershëm i Ekspertëve pranë DPA-së shqyrton vetëm vlerën historike të dokumentit dhe për dokumentet përpara vitit 1944, sipas ligjit, të gjitha konsiderohen dokumente me Rëndësi Historike Kombëtare.
DPA nuk ka pranuar në asnjë rast fotokopje, por vetëm dokumente origjinale në arkiv.
Komisioni i Ekspertizës merr për bazë ekspertizën e institucionit të vetëm shtetëror për verifikimin e origjinalitetit të dokumentit që është Instituti i Policisë Shkencore, prej vitit 2017.
Publikimi i një hetimi, për të cilin DPA nuk ishte në dijeni, përbën një tendencë për prishjen e imazhit të institucionit dhe jo për gjetjen e së vërtetës.
Tituj abuziv si „arkiva në shërbim të mafies“, përbëjnë tendencën për të prishur imazhin e një institucioni të besueshëm në sytë e qytetarëve shqiptarë të cilët marrin shërbim të shpejtë e korrekt nga ky institucion.
Jemi të keqardhur që kujdesiynë për rritjen e kontrollit mbi dokumentet e pranuara në arkiv, në vend të vlerësohej, po goditet në emër të qëllimeve për të abuzuar, qëllime të cilat DPA i ka penguar dhe do t’i pengojë me aq sa ka tagër ligjor. Ftojmë, çdo individ dhe media, që dëshiron të ushtrojë presion ndaj Drejtorisë së Përgjithshme të Arkivave për qëllime joligjore, të vijojë pa asnjë pengesë këtë „mision“. Njëherazi, i garantojmë që nuk do të kenë sukses në këtë „mision“. Ne presim me kënaqësi dhe zell të përballemi në gjykatë dhe në çdo institucion ligjor.
PADIA E QYTETARIT:
Discussion about this post