Projektligji i ri i propozuar nga qeveria për mediat online, duket se nuk është pritrur aspak mirë nga gazetarët, pasi gjobat me të cilat kërcënohen mediat kapin shifra marramendëse.
Gazetari i BIRN Besar Likmeta në një intervistë dhënë për Fax news është shprehur se projektligji i qeverisë nuk synon rregullimin e tregut online, po intimidimin e mediave, në mënyrë që të mos shkruajnë kundër interesave të partisë në pushtet.
”Gjobat janë ende shumë të larta nga 1 milionë deri në 10 milionë lekë të vejtra, ka një rregullim të dyfishtë që është dhe nga AMA dhe nga ana e AKEP. Pra ka gjoba që mund të shkojnë deri në 500 milionë lekë në 1 miliardë lekë për shkak të moszbatimit të urdhërave të AKEP dhe AMA. Nuk do të thotë që publikimet online kanë domosdoshmërisht lajme të rrema.
Këto ndryshime që janë bërë nga qeveria nuk kanë një përcaktim të qartë se çfarë është një lajm i rremë apo jo, ne e dimë shumë mirë që nga një mbledhje e qeverisë apo e parlamentit, dalin lajme të pavërteta. Qeveria ka pasur si qëllim që të mbrojë veten. Ka nevojë për një reagim më të madh kundër këtij ligji dhe nga ana e shoqërisë civile”, u shpreh Likmeta.
Gazetari sqaroi më tej se modeli i këtij ligji është marrë nga Rusia, dhe jo nga Kroacia, siç kanë deklaruar më herët përfaqësues të qeverisë.
“Ky ligj nuk është marrë nga modeli kroat, pasi një procedurë e tillë për gjobitjen e mediave online nuk ekziston. I vetmi vend që ka një ligj të ngjashëm ku dënohen mediat online për fyerjen e personave publik është në Rusi, dhe besoj se nuk ka shqiptarë që do të donte që të shkonte drejt këtij modeli”, u shpreh Likmeta.
