Raportuesi i Parlamentit Europian për Shqipërinë David Lega ka dhënë ultimatumin e fortë për qeverinë shqiptare e cila po përpiqet të kalojë në votim 2 projektligje për rregullimin kryesisht të medias online, mjaft të kontestuara nga komuniteti i gazetarëve brenda dhe jashtë vendit.
“Nëse Parlamenti shqiptar miraton ligjet e reja për median, ai vë në rrezik kryesimin nga Shqipëria të OSBE-së. Gjithashtu, ky vendim do të komplikojë negociatat për anëtarësimin në Bashkimin Europian. Për këtë arsye, rezistenca e fortë nga Partia Demokratike është e mirëpritur”, shkruan Lega i cili njëkohësisht është dhe anëtar i Komisionit të Jashtëm të Parlamentit Europian.
Kjo paketë e quajtur si ‘antishpifje’ nëse miratohet me 19 dhjetor, në seancën e ardhshme parlamentare do të vendosë të gjithë autoritetin e mbikëqyrjes dhe penaliteteve në duart e AMA-s duke kapërcyer rolin e gjykatës çka ka ngritur në këmbë jo vetëm gazetarët por dhe organizmat ndërkombëtarë që monitorojnë të drejtat dhe lirinë e shtypit dhe medias.
Discussion about this post