Paketa McAllister/ Basha mbledh për herë të tretë aleatët

Kreu i opozitës Lulzim Basha mbledh sërish aleatët parlamentarë në një mbledhje në selinë e Partisë Demokratike.

Takimi do të nisë në orën 21:00 ku pritet të diskutohet sërish për zgjidhjen e ngërçit politik dhe pjesëmarrjes në zgjedhje.

Ky është takimi i tretë i Bashës me krerët e partive aleate brenda së njëjtës ditë. 

Takimi i parë zgjati rreth 50 minuta, teksa afati i përcaktuar nga zv/ndihmës Sekretari amerikan i Shtetit, po skadon. Në takimin një ditë më parë, zyrtari amerikan Brian Hoyt Yee, i la vetëm 24 orë afat kryetarit të PD-së për të vendosur përfundimisht mbi paketën e bazuar në propozimet e McAllister. Ndërkaq ende nuk ka një përgjigje zyrtare nga Basha lidhur me këtë propozim të Yee.

Afati prej 24 orësh që Yee iu kishte lënë forcave politike është drejt skadimit dhe tashmë është vetëm çështje orësh për zyrtarizimin e vendimit final.

Kujtojmë se paketa ‘’McAllister’’ parashikon që opozita të marrë drejtimin e 4 ministrive, po ashtu të ketë dhe një monitorim më nga afër të procesit zgjedhor. (D.D/Shuplaka)