Në një operacion të zhvilluar në pikën kufitare të Morinës, Kukës, Policia Kufitare në bashkëpunim me DVP Kukës ka arrestuar në flagrancë një 35-vjeçar që tentoi të trafikonte në Shqipëri dy pako me lëndë të dyshuar narkotike kanabis.
Gjatë kontrollit të automjetit që drejtonte i arrestuari, u gjetën të fshehura dy pako me peshë totale 2 kilogramë e 227 gramë kanabis. Përveç lëndës narkotike, u sekuestrua edhe automjeti i përfshirë në tentativën e trafikimit. Materialet u referuan në Prokurorinë pranë Gjykatës së Shkallës së Parë në Kukës për ndjekje të mëtejshme ligjore.
Njoftimi i policisë:
Morinë, Kukës
Tentoi të trafikonte në Shqipëri, 2 pako me lëndë të dyshuar narkotike kanabis, arrestohet në flagrancë 35-vjeçari.
Sekuestrohen 2 pakot me peshë totale 2 kilogramë e 227 gramë dhe automjeti që drejtonte 35-vjeçari.
Shërbimet e Policisë Kufitare në Morinë, në vijim të kontrolleve për goditjen e krimeve kufitare, bazuar në analizën e riskut dhe në kontrollet me përzgjedhje, kanë goditur në bashkëpunim me shërbimet e DVP Kukës, një rast të tentativës për trafikim të lëndëve narkotike.
Për këtë rast, specialistët për Hetimin e Trafiqeve të Paligjshme dhe Narkotikëve të DVP Kukës arrestuan në flagrancë shtetasin P. G., 35 vjeç, banues në Fier.
Në hyrje të RSH-së, shërbimet e Policisë Kufitare kanë kaluar në vijën e dytë, për kontroll më të detajuar, automjetin tip “Audi”, me drejtues shtetasin P. G. Gjatë kontrollit në automjet, shërbimet e Policisë gjetën të fshehura 2 pako me lëndë të dyshuar narkotike kanabis, me peshë totale 2 kilogramë e 227 gramë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjthshem Kukës, për veprime të mëtejshme.
