Prej mbrëmjes së djeshme një pallat në Gjirokastër rrezikon shëmbjen për shkak të rrëshqitjeve të dheut.
Një pjesë e mirë e kateve të para janë tashmë të bllokuara nga sasia e madhe e dheut të rënë, ndërsa në rrezik ndodhen edhe tre banesa private që gjenden sipër rrugës ku kanë nisur shkarjet.
Pallati që rrezikon rënien është 8 katësh dhe ndodhet në lagjen “Kodra e Shtufit”. Të gjithë banorët janë në panik dhe prej mbrëmjes së djeshme kanë dalë jashtë pallatit duke u sistemuar te të afërm të tyre.
Reshjet që kanë rënë edhe gjatë natës e kanë bërë të vështirë ndërhyrjen në këtë zonë, ndërsa forca të Policisë janë të pranishme aty.
Ndërkohë vendimi më i fundit i bashkisë është që ata të sistemohen në konviktin e qytetit, ndërsa personat që janë më në moshë të çohen në azil.
Po ndërkohë ky vendim ka hasur në rezistencën e disa banorëve që nuk duan të largohen nga banesat e tyre.
(E.K/FAXWEB)
