Në ditën e 17 të protestës, demokrati Edi Paloka theksoi sërish vendosmërinë e opozitës për të mos u dorëzuar. Teksa e cilësoi veprim prej burracaku daljen e Ramës me të birin në përballjen me protestuesit, ai qartësoi qëndrimin e opozitës.
Paloka u shpreh se në qëndrimin e saj, i drejtohet të gjithë mazhorancës, përfshirë edhe LSI-në. Ai theksoi se pas 18 qershorit, Rama nuk do të lejohet të hyjë sërish në Kryeministri si kryeministër, pasi aty do të vendoset vetëm qeveria e ardhshme.
“Nuk jemi penduar për votën që dhamë për ndryshimet kushtetese. Rama kërkon ta rikthejë reformën në drejtësi aty ku ishte në fillim, aty ku Rama kontrollonte çdo fije të institucioneve tona. Ne e kemi thënë reforma në drejtësi do të bëhet sipas kushteve të 22 korrikut.
Nuk mund të bëhemi pjesë e një fasade që nuk mendon për interesat e qytetarëve, si mund të ulemi? Ia kemi bërë të qartë kryeministrit që mund të vijë pasi të japë dorëheqjen. Ky është kulmi, shfrytëzon fëmijën e tij për të bërë burracakun.
Sa për LSI-në nuk i ndamë, ne flasim për mazhorancën. Kur flas për t’u ulur për t’u bindur flas për mazhorancën, që duhet të ulet sa më shpejt. Sa më vonë, aq më keq për ta. Nuk kemi dalë të heqim nga karrigia Ramën dhe të vendosim Lulzim Bashën. Duam votën e lirë të shqiptarëve, t’ua japë këtë mundësi. Kërkojmë që shqiptarët të vendosin kush do jetë qeveria e ardhshme, ato që Edi Rama nuk do t’i lejojë.
Pas 18 qershorit ai nuk mund të hyjë më në zyrën që i takon, aty do të hyjë vetëm një qeveri e ligjshme.”, u shpreh ndër të tjera Paloka. (XH.A/SHUPLAKA)
