Janë publikuar pamjet e momentit të ekzekutimit të ish-efektivit të Policisë Ajet Zeqaj në zonën e ish-Bllokut në Tiranë, një ngjarje që ende nuk është zbardhur edhe pse ka kaluar më shumë se një vit.
Nga video e publikuar nga Lapsi.al duket momenti kur atentatori me pistoletë në dorë i afrohet viktimës dhe shkrep armën në drejtim të tij.
Autori është i veshur me xhinse, një xhaketë të zezë dhe mban një kapele të bardhë me strehë. Fytyra e tij është fiksuar vetëm në profil, por për policinë dhe prokurorinë nuk është e mjafueshme për të identifikuar se kush është autori edhe pse dyshohet se mund të jetë një vrasës me pagesë.
Nga pamjet e kamerave të sigurisë duket që atentatori edhe pasi rrëzohet viktima, vazhdon ta qëllojë nga afër për t’u siguruar që e ka vrarë.
Pak metra nga trupi i vrarë, policia ka gjetur pistoletën me silenciator, të cilën autori gjatë ikjes e kishte hedhur poshtë një makine. Pavarësisht gjetjes së saj ende nuk janë fiksuar gjurmë të gishtave.
Ish efektivi Zeqajt kishte 20 ditë që ishte kthyer nga Franca, ku kishte qëndruar disa muaj pas largimit nga Policia e Shtetit. Ai dyshohet se ishte pjesë e grupit kriminal të drejtuar nga Elton Çiço, i vrarë edhe ky 2 muaj më pas, më 1 maj, në një lokal në kryeqytet.
Zeqaj, që nga vitit 1996 deri në vitin 1999 ka qenë pjesë e Forcave Speciale në Ministrinë e Mbrojtjes. Në vitin 1999 deri në vitin 2001 ka punuar si agjent i antikrimit dhe në vitin 2001 deri 2002 ka punuar pranë policisë rrugore. (M.D/ Shuplaka)
