Pasi Donald Lu e uroi si punën e bërë si Ministër i Bujqësisë në këto 4 vite dhe bashkëpunimin, Edmond Panariti i ka dërguar një letër amabsadorit.
Panariti pjesë e LSI i shkruan ambasadorit se gjatë mandatit të shkuar janë kryer një sërë arritjesh.
“Vërtet nuk arritëm ende të sjellim gjigandin McDonalds në Shqipëri, por mëgjithëatë, para një viti ja dolëm të sjellim një gjigand tjetër amerikan të fushës se ushqimit, KFC (Kentucky Fried Chicken), i cili ofron prodhimet e tij ushqimore të markës, tërësisht me lëndë të parë nga produktet bujqësore të prodhuara në vend.”, shkruan Panariti.
LETRA E PLOTË
I nderuar Zoti Ambasador!
Ju falenderoj përzemërsisht për urimin dhe vlerësimin tuaj, për punën time 4-vjeçare në drejtimin e Ministrisë së Bujqësisë, Zhvillimit Rural dhe Administrimit të Ujërave. Jam shumë i lumtur që, sëbashku bëmë shumë për ndërtimin e serave më të mira dhe moderne, për të ndihmuar fermerët e përmbytur, si dhe ndërtimin e një qëndre didaktike dhe diagnostike profesionale veterinare në Kamëz.
Vërtet nuk arritëm ende të sjellim gjigandin McDonalds në Shqipëri, por mëgjithëatë, para një viti ja dolëm të sjellim një gjigand tjetër amerikan të fushës se ushqimit, KFC (Kentucky Fried Chicken), i cili ofron prodhimet e tij ushqimore të markës, tërësisht me lëndë të parë nga produktet bujqësore të prodhuara në vend
Kjo më dha, përpos te tjerave dhe një kënaqësi personale, sepse unë, një pjesë të studimeve pasuniversitare i kam kryer në Universitetin e Kentakit, në Shtetet e Bashkuara.
Jam i bindur se, edhe McDonalds do të vijë së shpejti në vendin tonë, sidoqoftë unë personalisht mbetem i përkushtuar ndaj “ushqimit dhe të ushqyerit të ngadaltë”, “Slow Food”.
Ka qenë një kënaqësi bashkëpunimi me ju dhe pres me padurim vazhdimin e bashkëpunimit me ju për forcimin e mëtejshëm të marrëdhënieve shqiptaro-amerikane. (J.V/Shuplaka)
