Ministri i Bujqësisë, Zhvillimit Rural dhe Administrimit të Ujrave, Edmond Panariti, ndodhet në Gjermani në kuadër të një vizite zyrtare, ku u takua me Ministrin Federal Gjerman të Bujqësisë, Christian Schmidt.
Në fokus të këtij takimi ishin projektet e përbashkëta në sektorin bujqësor. Mësohet se ministri Panariti kërkoi mbështetjen gjermane për zhvillimet e mëtejshme të rrjetit laboratorik të analizave fito-sanitare të produkteve bujqësore dhe blegtorale.
Nga ana tjetër, homologu Schimdt siguroi homologun shqiptar, për mbështetjen në krijimin e një laboratori rajonal analizash, i cili do të mbulojë të githa vendet e Ballkanit Perëndimor, specifikisht Kosovën, Maqedoninë dhe Malin e Zi. Ky laborator do të asistohet nga një laborator gjerman reference, me qëllim shmangien e vonesave dhe kontestimeve mbi pastërtinë e produkteve bujqësore në pikat doganore dhe në mbështetje të lehtësimin të marrëdhënieve tregëtare midis këtyre vendeve.
Në bisedën me Ministrin Federal Gjerman të Bujqësisë, Panariti mësohet se kërkoi mbështetje financiare për të përballuar sëmundje të panjohura deri tani në Europë, si Dermatoza Nodulare.
Ai kërkoi mbështetjen gjermane për të përcaktuar moshën e saktë të ulljnive të vjetër, me qëllim që të vërtetohet nese ato mund të konsiderohen monumente kulturore. (XH.A/SHUPLAKA)
